Hvað er Jamboree? WSJ N-Ameríka 2019

Hvað er Jamboree?

Orðið „Jamboree“ er sagt vera úr indíánamáli og þýðir „fjöldi stríðsmanna frá mörgum ættbálkum saman kominn til friðsamlegrar keppni“.  Baden – Powell stofnandi skátahreyfingarinnar valdi að nota þetta orð yfir heimsmót skáta, en hugmynd hans með mótinu var að koma á beinum kynnum einstaklinga af ólíkum uppruna.  Þannig mætti stuðla að friði í heiminum.

Heimsmót skáta (e. World Scout Jamboree) er haldið fjórða hvert ár og er ætlað skátum á aldrinum 14 til 17 ára. Þangað koma skátar frá flestum þjóðum heims og er því um einn stærsta viðburð í skátastarfi að ræða.

 

Hvað gerist á  World Scout Jamboree?

24. Heimsmót skáta verður haldið í N-Ameríku 22. júlí til 2. ágúst 2019.  

Heimsmót skáta er einstakt ævintýri sem enginn ætti að láta fram hjá sér fara! 

Með tímanum hefur  World Scout Jamboree breyst í stórviðburð þar sem 30-40 þúsund skátar frá yfir 150 löndum hittast á fjögurra ára fresti. Flestir eignast þar lífstíðarvini frá mismunandi stöðum í heiminum.  Á World Scout Jamboree muntu upplifa að skátaandinn nær yfir fjölmörg lönd þrátt fyrir mismunandi menningarheima, trúarbrögð og jafnvel styrjaldir. Á World Jamboree eru allir vinir.  Að búa með fólki alls staðar að úr heiminum í þéttri tjaldbúð þar sem friður, samvinna og skemmtun ræður ríkjum er einstök upplifun sem þú ættir ekki að missa af og vertu viss að þú munt eiga erfitt með að rifja upp síðar á æfinni allar sólarlandaferðirnar og önnur ferðalög, en þessi ferð mun örugglega standa upp úr – þannig hefur það verið meðal allra sem á Heimsmót skáta hafa farið í áranna rás.

 

Að taka þátt sem almennur þátttakandi

Ef þú ert fædd/ur á árunum 2001 til 2005 gefst þér tækifæri til að taka þátt í mótinu sem almennur þátttakandi. Í því fellst að þú færð að taka þátt í allri dagskrá mótsins. Heimsmót skáta eru haldin á fjögurra ára fresti og því færð þú aðeins þetta eina tækifæri til að fara á heimsmót sem almennur þátttakandi.

 

Að taka þátt sem sveitarforingi eða starfsmaður mótsins.

Ef þú ert á aldrinum 18 ára eða eldri átt þú kost á að sækja um sem sveitarforingi eða í starfsmannabúðum mótsins. Fjórir sveitarforingjar fylgja hverri sveit jafnt í undirbúningi mótsins, á leiðinni út og heim, sem og allan tímann á mótinu sjálfu. Á mótinu verða alþjóðlegar vinnubúðir sem er mjög spennandi kostur fyrir skáta á þessum aldri. Skátar í starfsmannabúðum hjálpa til við dagskrá, matarúthlutun, öryggisgæslu, stórviðburði, tjaldbúðarlíf og margt fleira. Ef þú ert eldri en 20 ára getur þú sótt um sem aðstoðarfararstjóri eða starfsmaður fararstjórnar. Í svona langferð með skátahóp eru ýmis verk sem þarf að sinna í undirbúningi og kynningu mótsins. Einnig þarf fólk til að vera á höfuðstöðvum okkar á mótinu og kynna skátastarf á Íslandi sem og að taka á málum sem kunna að koma upp.  

Algengar spurningar um World Scout Jamboree 2019

 

Ég er of ung/ur – get ég fengið undantekningu til að fara á WSJ19?

Skilyrði fyrir þátttöku á WSJ2019 eru sett af alheimssamtökunum -WOSM- og það eru því miður engar undantekningar leyfðar á aldurstakmörkunum fyrir þátttakendur á World Scout jamboree 2019. Almennir þátttakendur verða að vera fæddir á tímabilinu 22. júlí 2001 til 21. júlí 2005.

Þarf ég vegabréfsáritun/visa til að fara á mótið?

Það þarf að vera með gilda ESTA umsókn.

Er hægt að fara í heimsókn á mótssvæðið?

Það verður örugglega hægt að heimsækja mótssvæðið. Gestir þurfa sjálfir að sjá um að koma sér á staðinn. Við vitum ekki enn hvaða reglur munu gilda um heimsóknir og hvað verður í boði fyrir þá sem heimsækja svæðið. Það er ólíklegt að gestir fái að heimsækja sjálfar tjaldbúðirnar þar sem þátttakendur búa. Það er líka ólíklegt að gestir fái að heimsækja svæðin þar sem skátarnir taka þátt í afþreyingu og ævintýrum. Yfirleitt fá gestir að heimsækja „Torgið“ á Jamboree – og ef til vill einstaka afþreyingu sem mótsstjórn ákveður. Reynslan frá fyrri stórmótum sýnir að gestir verða að skrá sig inn á svæði sem er fyrir utan mótssvæðið og þeir fara síðan með rútum til og frá mótssvæðinu. Fjöldi gesta á degi hverjum verður takmarkaður og við setjum inn upplýsingar um leið og þær liggja fyrir svo sem hvað verður í boði fyrir gesti og hvar og hvernig hægt verður að tryggja sér gestapassa.

Get ég sjálf/ur séð um að kaupa flugmiðann til USA?

Við leggjum mikla áherslu á að fara út sem heild, þar sem ferðalagið er beint á mótsvæðið og gefst lítið tækifæri til að hitta fólk á leiðini, sama á við um heimleið. Þetta skiptir einnig máli í skipulagningu og kostnaði vegna flugfargjalda og rútu. En við ætlum að skoða þann möguleika að IST geti keypt ferð einungis á mótið og skilji við hópinn í Washington.

Þarf ég að fara í bólusetningu?

Vegna ferða til landa eins og Suður Evrópu, Madeira, Kanaríeyja, Bandaríkjanna og Japan þarf ekki sérstakra læknisráða við. Hins vegar er rétt að leita læknisráða ef þú ert með langvarandi sjúkdóm eins og hjartasjúkdóm, astma, nýrnasjúkdóm eða sykursýki. Tekið af vef Landlæknis jan 2018.

Hvernig get ég fjármagnað ferðina?

Styrktarsjóður skáta? Allskonar fjáraflanir mögulegar – notið hugmyndaflugið og fáið ráðleggingar frá eldri skátum.

Hvaða einkenni fáum við?

Einkenni verða skoðuð með hópnum þegar nær dregur ferð. Dæmi um einkenni sem hafa verið eru merki, húfur, bolir, peysur og bakpokar.

Hvað gerum við í Washington eftir Jamboree?

Áætlað er að sveitirnar verði að hluta til saman í Washington. Þar stefnum við að því að vera á gistiheimili. Dagarnir verða skipulagðir af sveitunum eða í minni hópum eftir áhugasviði þátttakanda. Lagt verður upp úr því að sveitirnar skoði menningu borgarinnar með því að labba um og fara á söfn. Einnig verður farið í búðir og kíkt á skemmtilegar afþreyingar. Það mun fara eftir stærð hópsins hvort ein sameiginleg máltíð verði í Washington.

Hvenær rennur umsóknarfresturinn út?

Unnið er að því að hópurinn ferðist saman út og heim. Ef erfiðleikar verða í bókun vegna fjölda verður reynt að ferðast í sveitum. Mögulega fara einhverjir úr farastjórn og IST út á undan til undirbúnings.

Af hverju þarf að sækja um svona snemma?

Til þess að undirbúa svona stórar viðburð eins og WSJ er, er nauðsynlegt að fá skráningu svona snemma. Einnig er það gert til að mynda heild og gefa skátum möguleika á að fjármagna svona ferð.

 

:: Hér má finna Spurningar og Svör í PDF útgáfu