Heillaráð sem halda fíkniefnum frá

Forvarnardagurinn sem haldinn er í dag er helgaður nokkrum heillaráðum sem geta forðað börnum og unglingum frá fíkniefnum.

Íslenskar rannsóknir sýna að þeir unglingar sem verja minnst klukkustund á dag með fjölskyldum sínum eru síður líklegir en aðrir til að hefja neyslu fíkniefna. Að sama skapi sýna niðurstöður að mun ólíklegra sé að ungmenni sem stunda íþróttir og annað skipulagt æskulýðsstarf, falli fyrir fíkniefnum. Í þriðja lagi sýna rannsóknirnar fram á að því lengur sem ungmenni bíða með að hefja áfengisneyslu, þeim mun ólíklegra er að þau neyti síðar fíkniefna.

Frá kynningu á Forvarnardeginum 2015

Frá kynningu á Forvarnardeginum 2015

Þessar niðurstöður byggja á rannsóknum vísindamanna við Háskóla Íslands og Háskólann í Reykjavík sem hafa um árabil rannsakað áhættuhegðun ungmenna og hafa þær vakið alþjóðlega eftirtekt.

Í þessu samhengi má benda á að skátastarf er kjörinn vettvangur fyrir samstarf foreldra og ungmenna. Verkefnin eru fjölbreytt og við flestra hæfi og reyna bæði á huga og hönd og eru unnin ýmist úti eða inni, að vetri eða sumri.

Stuðningur foreldra er mikilvægur

Í tengslum við Forvarnardaginn er gott að rifja upp nokkrar staðreyndir:

  • Rannsóknir hafa leitt í ljós að unglingar foreldra sem vita gjarnan hvar þeir eru á kvöldin og með hverjum, eru ólíklegri til að neyta áfengis og vímuefna en þeir unglingar sem eru undir minna eftirliti.
  • Því meiri tíma sem foreldrar verja með unglingum því ólíklegra er að þeir leiðist út í áfengis- og vímuefnaneyslu.
  • Þeir unglingar sem telja sig auðveldlega geta fengið stuðning frá foreldrum sínum eru ólíklegri en aðrir til að leiðast inn á braut áfengis- og vímuefnaneyslu.
  • Foreldrar sem þekkja aðra foreldra í hverfinu og vini barna sinna draga úr líkum á því að unglingarnir ánetjist áfengi og vímuefnum. Það þarf heilt þorp til að ala upp eitt barn.
  • Samstarf foreldra, þar með talið þátttaka í skólastarfi, æskulýðs- og íþróttastarfi og foreldrarölt, er mjög af hinu góðu. Þekktu foreldra skólafélaga og vina unglinga þinna og vertu hluti af samfélagi og neti foreldra. Láttu þig varða hag unglinga almennt.
  • Unglingar sem stunda skipulagt íþrótta- og æskulýðsstarf undir leiðsögn ábyrgra aðila eru ólíklegri til að leiðast út í áfengis- eða vímuefnaneyslu eða aðra óæskilega hegðun.
  • Því lengur sem unglingar sniðganga áfengi því ólíklegra er að þeir ánetjist áfengi eða vímuefnum. Hvert ár skiptir máli.
  • Öflugt forvarnarstarf þarf að beinast að því að bæta umhverfi unglinga. Miklu skiptir að allir vinni saman; foreldrar, kennarar og þeir sem skipuleggja íþrótta- og æskulýðsstarf. Allir þessir aðilar verða að leggjast á eitt eigi góður árangur að nást. Forvarnarstarf er grasrótarstarf.

Að frumkvæði forseta Íslands

Forvarnardagurinn er haldinn að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskóla Íslands og Háskólann í Reykjavík. Það er svo lyfjafyrirtækið Actavis sem styður verkefnið.

 

Tengt efni

forvarnardagur.is

ENGIN UMSÖGN

Skilja eftir svar