forsidukassi_gilwellÞað urðu tímamót í sögu Gilwell-skólans um helgina 8.-9. nóvember þegar 16 skátar af Norður- og Austurlandi sóttu fyrri hluta Gilwell-leiðtogaþjálfunarinnar (skref 1 og 2) sem haldið var í Hvammi, skátaheimili Akueyrarskáta. Námskeiðin sóttu fjórir skátar frá Héraðsbúum og tólf frá Klakki – þar af fjórir sem eru félagar í Skátagildinu Kvisti á Akureyri.

Tveir voru gamlir Gilwell-skátar sem sóttu námskeiðið sem sí- og endurmenntun. Þetta var breiður hópur hvað aldur og skátareynslu varðar (meðalaldur 35 ár) – en afar áhugasamur og í honum sköpuðust mjög skemmtilegar og uppbyggjandi umræður. Endurmat þátttakenda var afar jákvætt og var augljóst að þeir kunnu að meta námskeiðin.

Þó að Gilwell-námskeið hafi áður verið haldin utan höfuðborgarsvæðisins eða Úlfljótsvatns var þetta í fyrsta sinn sem markvisst átak var gert í samvinnu við viðkomandi skátafélög til að fjölga fullorðnum sjálfboðaliðum og bjóða þeim fyrri hluta Gilwell-leiðtogaþjálfunar heima í héraði. Ætlunin er að fara í sambærilegt átak í samvinnu við tiltekin skátafélög á fleiri stöðum á næstu misserum.

Markmið helgarinnar voru:

  • Öðlast dýpri skilning á markmiðum og grunngildum skátahreyfingarinnar sem alþjóðahreyfingar og kjarna skátastarfs sem byggt er á þessum grunngildum.

    ak-stulka
    Kátt á hjalla!
  • Þekkja og skilja Skátaaðferðina sem kjarnaaðferð í skátastarfi barna og ungmenna.
  • Þekkja og skilja flokkakerfið, táknræna umgjörð, tengslin á milli markmiða skátahreyfingarinnar, ólíkra þroskasviða og þroskaferils skátanna.
  • Gera sér grein fyrir hlutverki leiðtoga í skátastarfi.

Benjamín Axel Árnason, Dagbjört Brynjarsdóttir og Ólafur Proppé fóru norður og héldu námskeiðin fyrir hönd Gilwell-skólans í góðri samvinnu við Ólöfu Jónasdóttur félagsforingja Klakks.

Gilwell-leiðtogaþjálfun – fimm skref í tveimur áföngum

Gilwell-þjálfunin er leiðtogaþjálfun fyrir fullorðna sjálfboðaliða í skátastarfi byggð á alþjóðlegum grunni WOSM (World Organization of the Scout Movement). Þeir sem ljúka Gilwell-leiðtogaþjálfun fá alþjóðleg einkenni og verða hluti af alþjóðlegri sveit Gilwell-skáta. Þjálfuninni er skipt í tvo hluta:

  • Fyrri hluti
  • Skátaaðferðin – starfsgrunnur skáta (fyrsta skref)
  • Markmið og leiðir í skátastarfi (annað skref)
  • Seinni hluti
  • Verkefni í skátastarfi – (um viðfangsefni skátanna) (þriðja skref)
  • Viðburðastjórnun og skipulagning skátastarfs – (um viðfangsefni leiðtoga í skátastarfi) (fjórða skref)
  • Leiðtogi í eigin lífi – (um hlutverk leiðtoga og eflingu þeirra í skátastarfi og í eigin lÍfi) (fimmta skref)

Einnig námskeið um „réttindi barna“ og „skyndihjálp“.

Ugluflokkurinn brýtur málin til mergjar.
Ugluflokkurinn brýtur málin til mergjar.

Fyrir hverja er Gilwell-leiðtogaþjálfun?

  • Alla fullorðna sjálfboðaliða í hverju skátafélagi
  • Skáta 18 ára og eldri sem eru virkir í skátastarfi
  • Skáta 18 ára og eldri sem ekki eru virkir í skátastarfi
  • Foreldra skáta
  • Aðra markhópa sem við viljum fá í sjálfboðastörf fyrir skátahreyfinguna
  • Alla fullorðna sem vilja bæta heiminn með skátastarfi
  • Alla fullorðna sem vilja þjálfa leiðtogafærni sína í skátastarfi

Markmiðið er að sem allra flestir fullorðnir sjálfboðaliðar sem vinna að framgangi skátastarfs – bæði í einstökum skátafélögum og á öðrum vettvangi – ljúki Gilwell-leiðtogaþjálfun.

Ljósmyndir: Árni Már Árnason / Texti: ÓP
:: Nánari upplýsingar um Gilwell-leiðtogaþjálfun.