Á morgun halda Íslendingar upp á sumardaginn fyrsta, en hann er fyrsti dagur Hörpu skv. gamla norræna dagatalinu.

Skátar hafa alla tíð staðið fyrir hátíðahöldum á þessum degi.

Skátamessa verður að þessu sinni í umsjón Skátafélagsins Klakks á Akureyri. Messað verður í Akureyrarkirkju kl. 11:00 og verður þeirri messu útvarpað á Rás 1. Marta Magnúsdóttir skátahöfðingi flytur hugvekju.

Hér er listi yfir hátíðahöld skátafélaga um land allt.

Við hvetjum alla til að gleðjast saman með skátafélögunum.

Sumardagurinn fyrsti 2018
 
Hátíðahöld skátafélaga um land allt  
Bæjarfélag Skátafélag Skrúðganga Hátíðahöld Tengiliður
Akureyri Skátafélagið Klakkur Á undan messunni verður skrúðganga frá skátaheimilinu Hyrnu, að Akureyrarkirkju. Klakkur verður með skátamessu/samveru í Akureyrarkirkju þetta árið. Messunni verður útvarpað þaðan að þessu sinni. Marta Magnúsdóttir, skátahöfðingi Íslands flytur hugvekju. Að messunni lokinni verður fjölskylduhátið að Hömrum kl. 12:30, þar verður súpa, grill og þrautir. Jóhann Malmquist
Hafnarfjörður Skátafélagið Hraunbúar Skrúðganga mun fara frá Víðistaðakirkju kl. 13:45 og halda niður á Thorsplan þar sem Hraunbúar eru með dagskrá. Hraunbúar verða við skátamessu í Víðistaðakirkju kl. 13:00 – Hraunbúar hafa svo skipulagða fjölskyldudagskrá á Thorsplani frá 14 – 16. hraunbuar@hraunbuar.is
Reykjanesbær Skátafélagið Heiðabúar kl.12:30 frá Skátaheimili að Keflavíkurkirkju Skátamessa í Keflavíkurkirkju kl.13. Hátíðarhöld í Skátaheimili að lokinni messu. Haukur Hilmarsson, s: 699-4070
Hveragerði Skátafélagið Strókur kl. 10:45 frá skátaheimilinu Messa kl. 11 og svo verður boðið upp á súpu í skátaheimilinu að lokinni messu.
Mosfellsbær Skátafélagið Mosverjar kl. 13:00 frá Bæjartorginu að Íþróttamiðstöðinni að Varmá. Við íþróttamiðstöðina að Varmá: Fjölskylduskemmtun með hoppuköstulum, skátaleiktækjum, og pylsugrilli frá kl. 13:30-16:00 Dagbjört Brynjarsdóttir, s. 862-4605
Garðabær Skátafélagið Vífill Kl. 14 frá Vídalínskirkju að Hofsstaðarskóla Skátamessa í Vídalínskirkju kl. 13, ræðumaður Jóhanna María Bjarnadóttir rekkaskáti. Dagskrá við Hofsstaðaskóla eftir 14:30. Leiktæki, veltibílinn, Jói P og Króli verða með atriði og kynning á Hjálparsveit skáta í Garðabæ. Sjoppa á staðnum. Skátakaffi í samkomusal Hofsstaðaskóla frá 15.00 – 17.00. Dögg Gísladóttir, s. 8990089
Kópavogur Skátafélagið Kópar Kl 13:30 frá Digraneskirkju að Fífunni Fjölskylduskemmtun í Fífunni kl 14 með hoppuköstulum, leikhópnum Lottu og fleiri skemmtiatriðum. Ása Dögg – kopar@kopar.is,               s. 5544711
Akranes Skátafélag Akranes frá Skátaheimilinu kl 10:30 skátamessa í Akraneskirkju kl 11
Vesturbær, Reykjavík Skátafélagið Ægisbúar Engin Jamboreefarar standa fyrir fjáröflun með candyflossölu á hátíðarhöldum í Vesturbænum Helga Rós s.659-4949 skati@skati.is
Árbær, Reykjavík Skátafélagið Árbúar Kl 11:00 frá Árbæjarsundlaug Opið hús frá kl 13:00 – 15:00 í Hraunbæ 123, póstaleikur, hoppukastali, vöfflu og kaffisala og ýmislegt fl. Guðrún Sigtryggsdóttir, s. 699-1940, arbuar@skatar.is
Miðborg og Hlíðar, Reykjavík Skátafélagið Landnemar Engin Úti- og inniskemmtun við félagsmiðstöðina Hundrað og einn Reykjavík, en hún við Austurbæjarskóla. Félagið verður með kassaklifur fyrir unglinga,  ratleik fyrir yngstu börnin og útieldun fyrir alla. Tryggvi Bragason, s. 561-0071, starfsmadur@landnemi.is
Breiðholt, Reykjavík Skátafélögin Segull og Hafernir Engin Aparóla og lopasleikjósala við Félagsmiðstöðina Hólmasel.  Einnig verður boðið uppá ratleik og útieldun ef veður leyfir. Þórhallur Helgason, laddih@gmail.com, s. 867-0004
Sigrún Ósk Arnardóttir, kjaftaskur@gmail.com, s. 846-5417
Grafarvogur, Reykjavík Skátafélagið Hamar Skrúðganga leggur af stað klukkan 11 frá Spöng Skemmtun við Rimaskóla frá 11:30 til 14:00
Bústaðahverfi, Reykjavík Skátafélagið Garðbúar kl 13:00 skrúðganga frá Grímsbæ að Bústaðakirkju 13:30 dagskrá í Bústaðakirkju  14:00 Dagskrá í víkinni skátarnir með candyfloss sölu, leikitæki og leiki Nanna Guðrún, s: 823-5028, gardbuar@gardbuar.com
Laugardalur, Reykjavík Skátafélagið Skjöldungar Frá Skjöldungaheimilinu kl. 10:30 að Dalheimum. Dagskrá byrjar þar kl. 11 Grillað brauð yfir eldi fyrir utan Dalheima og líka farið í skátaleiki. Signý Kristín Sigurjónsdóttir, skjoldungar@skjoldungar.is, s. 894-3411
Selfoss Skátafélagið Fossbúar Kl. 13:00 frá Hafnarplani um Austurveg, Reynivelli, Engjaveg og Tryggvagötu að Glaðheimum Skemmtidagskrá og vöfflukaffi er við Glaðheima, skátaheimili Fossbúa í framhaldi af skúðgöngu. Inga Úlfsdóttir, s. 698-9199
Borgarnes Skátafélag Borgarness Engin Skátar standa heiðursvörð í messu í Borgarneskirkju Árni Guðjónsson, s. 823-0073        Signý Óskarsdóttir, s. 698-9772

Skátastarf á Íslandi er 105 ára í dag og það er hægt að líta björtum augum til framtíðar. Skátastarf á erindi til ungmenna í dag alveg eins og það gerði fyrir hundrað árum. Það er verkefni okkar sem að skátastarfi stöndum að tryggja það að skátastarf sé traustur og öruggur vettvangur fyrir ungmenni til að eiga margar af bestu stundum lífs síns, öðlast aukið sjálfstraust, meiri víðsýni, meiri gleði og vaxa á alla vegu. Það tryggjum við með því að gera hlutina vel og hlúa að kjarnanum. Ef kjarninn er í lagi stækkar hann af sjálfu sér.

Til hamingju með afmælið!

Marta Magnúsdóttir,
skátahöfðingi

Ungmennastarf Rauða krossins ætla að setja upp leikinn “Á Flótta” þann 4. nóvember nk. Þau vilja fá með sér skáta á rekka- og róverskátaaldri, þ.e. frá 15 ára, sem þátttakendur í leiknum.

Leikurinn fer fram í Klébergsskóla á Kjalarnesi þann 4. nóvember næstkomandi. Þátttakendur eru settir í spor flóttafólks í þann tíma sem leikurinn tekur, og ganga í gegn um raunir á borð við erfið ferðalög og óvissu um örlg sín. Markmiðin eru að efla samkennd ungs fólks á Íslandi með flóttafólki, og kveikja áhuga og eldmóð á þeim málaflokki. Leikinn teljum við minnisstæða upplifun sem sé betur fallinn til þess heldur en fræðsla af öðru og rólegra tagi.

Leikurinn verður haldinn eins og áður er ritað, í Klébergsskóla á Kjalarnesi og hefst laugardaginn 4. nóvember kl 19:00 og tekur um 12 klst. í spilun. Boðið verður upp á rútu frá Reykjavíkursvæðinu fyrir þátttakendur.

Pláss er fyrir 35 þátttakendur í leiknum, fyrstur kemur fyrstur fær.

:: SKRÁNING FER FRAM HÉR HJÁ RAUÐA KROSSINUM

Leikurinn veðrur kynntur fyrir forráðamönnum þátttakenda sem eru yngri en 18 ára vikur fyrir liek, og þurfa þeir sem eru undir 18 ára aldri að skila leyfi foreldra fyrir þátttöku.

Skráningargjald er kr. 1.000,-

Frekari upplýsingar hjá thorsteinn@redkross.is

 

Kæru skátasystkini,

Gengið hefur verið frá ráðningu á nýjum framkvæmdastjóra Bandalags íslenskra skáta. Staða framkvæmdastjóra var auglýst og eftir ráðningaferli var ákveðið að ráða Kristinn Ólafsson viðskiptafræðing og starfandi framkvæmdastjóra Grænna skáta.

Kristinn hefur m.a. starfað sem framkvæmdastjóri hjá Slysavarnafélaginu Landsbjörg, framkvæmdastjóri hjá augnlæknastöðinni Sjónlagi og sem verkefnastjóri hjá Capacent Gallup.

Kristinn starfaði sem skáti með Ægisbúum hér á árum áður og hefur verið virkur í Hjálparsveit skáta í Reykjavík í 37 ár. Á árunum 2014-2016 var Kristinn gjaldkeri í stjórn BÍS.

Stjórn BÍS þakkar Hermanni Sigurðssyni fráfarandi framkvæmdastjóra BÍS fyrir hans góðu störf. Hann hefur verið ráðinn framkvæmdastjóri Landssambands slökkviliðs- og sjúkraflutningamanna (LSS) og óskum við honum velfarnaðar í starfi.


Kristinn mun hefja störf sem framkvæmdastjóri BÍS 1. nóvember. Við bjóðum hann innilega velkominn til aukinna starfa fyrir skátana á Íslandi og hlökkum til að vinna öll saman að því að efla skátastarf á Íslandi.

Forvarnardagur 2017 verður haldinn miðvikudaginn 4. október næstkomandi. Dagurinn er helgaður nokkrum heillaráðum sem geta forðað börnum og unglingum frá fíkniefnum, ráðum sem eiga erindi við allar fjölskyldur í landinu.

Forvarnardagurinn er haldin að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskóla Íslands og Háskólann í Reykjavík.
Verkefnið er stutt af lyfjafyrirtækinu Actavis.

  • Rannsóknir hafa leitt í ljós að unglingar foreldra sem vita gjarnan hvar þeir eru á kvöldin og með hverjum, eru ólíklegri til að neyta áfengis og vímuefna en þeir unglingar sem eru undir minna eftirliti.
  • Því meiri tíma sem foreldrar verja með unglingum því ólíklegra er að þeir leiðist út í áfengis- og vímuefnaneyslu.
  • Þeir unglingar sem telja sig auðveldlega geta fengið stuðning frá foreldrum sínum eru ólíklegri en aðrir til að leiðast inn á braut áfengis- og vímuefnaneyslu.
  • Foreldrar sem þekkja aðra foreldra í hverfinu og vini barna sinna draga úr líkum á því að unglingarnir ánetjist áfengi og vímuefnum. Það þarf heilt þorp til að ala upp eitt barn.
  • Samstarf foreldra, þar með talið þátttaka í skólastarfi, æskulýðs- og íþróttastarfi og foreldrarölt, er mjög af hinu góðu. Þekktu foreldra skólafélaga og vina unglinga þinna og vertu hluti af samfélagi og neti foreldra. Láttu þig varða hag unglinga almennt.
  • Unglingar sem stunda skipulagt íþrótta- og æskulýðsstarf undir leiðsögn ábyrgra aðila eru ólíklegri til að leiðast út í áfengis- eða vímuefnaneyslu eða aðra óæskilega hegðun.
  • Því lengur sem unglingar sniðganga áfengi því ólíklegra er að þeir ánetjist áfengi eða vímuefnum. Hvert ár skiptir máli.
  • Öflugt forvarnarstarf þarf að beinast að því að bæta umhverfi unglinga. Miklu skiptir að allir vinni saman; foreldrar, kennarar og þeir sem skipuleggja íþrótta- og æskulýðsstarf. Allir þessir aðilar verða að leggjast á eitt eigi góður árangur að nást. Forvarnarstarf er grasrótarstarf.

Frekari upplýsingar um Forvarnardaginn má finna á vefsíðu átaksins. 

Þar má einnig finna skemmtilegan netratleik með flottum vinningum fyrir ungt fólk fætt 2000-2003.